華富邨 - 華富一號

近日聽到這首歌, 有很多感受, 亦有很多回憶! "" 有些朋友會很介意住公屋, 但我沒有這個想法.以前住屋邨, 鄰里關係好好. 借鹽借豉油,幫手睇細路及買餸等是小事. 個個小朋友出走廊玩, 跳橡筋繩, 滑板, 煲蠟, 紅綠燈, 玩到夠鐘食飯便返屋企. 唯一住屋邨就無乜私隱, 隔離鬧交打仔你會知, 對面煮乜餸你會聞到, 打斜單位睇緊邊套電視劇, 隔空你會聽到.不過總括來說是開心的.

爸爸以前在屋邨是一名中醫. 還記得我們移民前,街坊街里在街上碰見爸爸,總會問候吓, 有些街坊在談話中唔多唔少流露了一些不捨.即將拆卸的華富邨, 我也不捨.這裡有我很多的童年回憶. 細個時經常和爸爸去華富酒樓飲茶, 周末早上和爸爸落瀑布灣公園停車場內買海鮮, 生日時爸爸帶我去邨口大大公司內吃鐵板餐, 讀中學時和同學仔一齊坐巴士返學放學, 這些快樂時光雖隨著時間慢慢流逝, 但回憶永遠留在我腦海中.《再見UFO》記錄了一個即將消失的舊公共屋邨, 將來的重建會抹掉現有的痕跡.

2020 年一套電視劇 "香港愛情故事", 鏡頭下把華富邨拍得很美. 如今歌曲 "華富一號" 是向華富邨說聲告別嗎? 歌詞內 "往日屋邨一切記得嗎?歡笑與喧嘩" 及 "瞬間消散最使人念掛"最觸動我心靈. 另一歌詞 "奇怪事你見過嗎?不明事件真的嗎?" 住華富邨時最多人講係猛鬼和UFO, 而我甚麼都無見過.